पहिला पाडवा

पहिला पाडवा
प्रीतीची ह्यांच्या,त-हाच ही न्यारी,
अशी ग कशी,तिकडची स्वारी।
पहिली दिवाळी,जमली सगळी,
लहानथोर अन वडिलमंडळी,
त्यांच्यादेखत छेड काढीता,
होई ग मी बावरी,
अशी ग कशी,तिकडची स्वारी।
रांगोळी मी काढत असता,
कमरेला ग बसला चिमटा,
रंगाचा मग उठे फराटा,
त्यांच्या गालावरी,
अशी ग कशी तिकडची स्वारी।
निलाजरेपण,कळस गाठता,
येता जाता मारीती धक्का,
नजर चुकविता सगळ्यांची मग,
उठली ग शिरशिरी,
अशी ग कशी,तिकडची स्वारी।
तेल तयांना लावत असता,
चावट कसले,उगाच हसता,
धडधड उरात थरथर हाता,
मी नवरी लाजरी,
अशी ग कशी तिकडची स्वारी।
उटणे लावूनी स्नान घालीता,
अवचित त्यांनी मला भिजवले,
ओलिचिंब अन मला बघुनी,
हसती ग सारी....!
अशी ग कशी तिकडची स्वारी।